محطة كاسيك مصر- Caasic Egypt Broadcast
CAASIC Advanced Arabic Language Materialsأرشيف لـأمثال شعبية
– أمثال من اختيارنا
– في التدوينة دي هتلاقوا مجموعة أمثال شعبية مصرية مشهورة اخترنها وعلقنا عليها بصوت صديقتنا سايونارا بأسلوب بسيط وسهل ومختصر…
و قال على رأي المثل…….
———————————————–
– أمثال قديمة جديدة من وحي الثورة
هتلاقوا هنا مجموعة من الأمثال الشعبية المصرية المشهورة اللي اتغيرت شوية (بخفة دم مصرية) أثناء وبعد الثورة المصرية 2011…
المطلوب منكو إنكو تسألوا مصريين عن معاني الأمثال الأصلية وتحاولوا تفهموا معنى المثل بعد التغيير اللي حصلهم… لو عرفتوا تسجلوا مع المصريين يكون هايل وممكن نعرض اللي وصلتوا ليه في الفصل للمناقشة…
امثال 2011
– المولوتوف صابني ورب العرش نجاني… الأصل (العين صابتني ورب العرش نجاني)
– كله سلف و إخوان… الأصل (كله سلف ودين)
– اللي أوله شرم اخره طره… الأصل (اللي أوله شرط آخره نور)
– العين ماتعلاش على النائب… الأصل (العين ماتعلاش على الحاجب)
– اللي عنده رئيس محيره يعمل ثورة ويطيره… الأصل (اللي عنده قرش محيره يجيب حمام ويطيره)
– ساعة الحظر متتعوضش… الأصل (ساعة الحظ ما تتعوضش)
– اجرى يا ابن ادم جرى الوحوش ياتلحق بورتو طرة يامتلحقوش… الأصل (اجري يا ابن آدم جري الوحوش غير رزقك لن تحوش)
– ضل جيش ولا ضل حسني… الأصل (ضل راجل ولا ضل حيطة)
– هتقولهملى حسنى حسنى هاقولهملك سوزان سوزان… الأصل (هتقولهم لي نيللي نيللي هاقولهم لك شريهان شريهان)
– يامورث في غير ملكك.علي طره انت وعيلتك… الأصل (يا مربي في غير ولدك يا باني في غير ملكك)
– الشعب اللي يجيللك منه الريح.اتنحي عنه واستريح… الأصل (الباب اللي يجيلك منه الريح سده واستريح)
– مسابقة الأمثال
– مسابقة الأمثال:
كل أسبوع هنقدم مثلين شعبيين مصريين… والمطلوب في المسابقة دي إن الطلاب يجمعوا أكبر عدد من الأمثال ويألفوا قصة وممكن طبعاً يكون فيها حوار.. بس الأساسي إنهم يستخدموا الأمثال دي في سياق صحيح ومناسب… يا سلام كمان لو سجلوا القصة دي بصوتهم عشان نشوف إزاي بيلقوا المثل…
طبعاً هايحتاج الطلاب سؤال بعض المدرسين في الكاسا أو مصريين من اللي يعرفوهم… مافيش مانع خالص من الاستعانة بالناس دي… وأكيد دا هايخلي الطلاب يعرفوا يلقوا الأمثال بشكل أحسن…
إتفضوا معانا… :)
ملاحظة: شكر خاص لصاحبة الفكرة وهي الطالبة السابقة بكاسا “إرن كولنز”
الأسبوع الأول:
1) “اقلب القدرة على فمها تطلع البنت لأمها”
دائماً ما تنشأ البنت كأمها بنفس الطباع والشخصية.
* القدرة: الفول مطبوخ في القدرة.
———————————————–
2) “شيل دا عن دا يرتاح دا من دا”
بمعنى لو تشاجر شخصان الحل الأسهل هو إبعاد أحدهما عن الآخر.
———————————————————————————————————-
الأسبوع التاني:
1) “اجري جري الوحوش غير رزقك ماتحوش” أو “إجري يا ابن آدم جري الوحوش وغير رزقك لن تحوش”
بمعنى مهما فعلت نصيبك لن يتغير. الرزق من ربنا والإنسان غير قادر على أن يزيده.
———————————————–
2) “اللي فات مات واحنا أولاد دلوقتي”
بمعنى سننسى الماضي وسنبدأ من جديد.
———————————————————————————————————-
الأسبوع التالت:
1) “كَبوا القهوة من عَمَاهم وقالوا الخير جَاهم”
يعني يرتكب الناس الغلط ولكنهم لا يعترفون به أو يتصورون خطأً أنه خير.
———————————————–
2) “امْشي دوغْري يِحتار عَدوك فيك.”
دوغري: اذهب إلى الأمام, يعني لا تنحرف عن الصواب ولن يستطيع خصمك أن يضرك.
———————————————————————————————————-
الأسبوع الرابع:
1) “ضٍل راجل ولا ضٍل حيطة”
يعني المرأة تحتاج لرجل يحميها.
———————————————–
2) “ضَرَط الإمام خِريوا المُصَلٍّين.”
ضرط = أخرج ريحاُ من الإست مع صوت
خرى – تغوّط
وهذا المثل يشير إلى أن الأتباع يبالغون في تقليد أوامر زعيمهم..
———————————————————————————————————-
الأسبوع الخامس:
1) “كل اللي يعجبك البس اللي يعجب الناس”
يعني من الأحسن بالنسبة للأشياء السطحية الظاهرية وغير المهمة أن يفعل الشخص مثل ما يفعل الآخرين آما بالنسبة للأشياء الهامة من الأفضل أن يتبع كل شخص قلبه ورأيه هو.
———————————————–
2) “اللي أوله شرط، آخره نور”
يعني لو ناقش شخصان كل الشروط لمشروع ما ووصلا إلي تفاهم من البداية، سيتجنبا المشكلات بل وسيحدث خير.
———————————————————————————————————-
الأسبوع السادس:
1) “القرد في عين أمه غزال”
يعني الأم تعتقد دائماً ان أطفالها أفضل وأجمل وأحسن أطفال في العالم.
———————————————–
2) “إبن الوِز عوام”
يعني الابن دائماً يشبه أباه في كل شيء.
———————————————————————————————————-
– ودنك منين يا جحا
اسمعوا وجاوبوا:
1- مين حجا؟
2- وليه جحا بالذات في المثل دا؟
3- اسألوا مصريين على حجا ولو ليه أمثال تانية؟ وإيه هي؟
4- فيه في ثقافتكو شخص زي جحا ممكن ننسب ليه أمثال وحِكَم مشهورة؟
5- مثلوا مشهد يشرح معنى المثل دا.
– نوم الظالم عبادة
اسمعوا وجاوبوا:
1- تفتكروا مين هو الظالم؟ يعني ممكن أقول إن لو “مبارك المخلوع” نام هو بكدا يكون بيتعبد وبالتالي ياخد حسنات مثلاً من ربنا على أساس إن نومه عبادة؟
2- إزاي ممكن يكون النوم عبادة؟
3- طيب لو النوم عبادة هل دا يبرر نوم بعض الناس طول النهار في رمضان مثلاً؟ طبعاً ممكن تسألوا مصريين…
4- اسمعوا وفكروا في موقف حصل لكو المثل دا بيعبر عنه.
– على وشك يبان يا نداغ اللبان
اسمعوا وجاوبوا:
1- فكروا في موقف ممكن تستخدموا المثل دا فيه.
2- كلمة “ندَّاغ” مأخودة من كلمة فصيحة.. خمنوا إيه هي الكلمة دي.
3- تفتكروا موقف حصل معاكوا والمثل دا بيوصفه كويس؟
4- أكيد فيه مثل في ثقافتكوا ليه معنى زي معنى المثل دا، إيه هو؟
– على قد لحافك مد رجليك
اسمعوا وجاوبوا:
1- ممكن نستخدم المثل دا إمتى؟
2- فيه ناس بتقول إن المثل دا ضد الطموح والتطلع للأحسن… هل تتفقوا مع الرأي دا؟ وليه؟
3- فكروا في موقف حصل لكو والمثل دا بيلخصه.
4- فيه مثل بنفس المعنى في ثقافتكو؟
– سبع صنايع والبخت ضايع
اسمعوا وجاوبوا:
1- مين الشخص اللي تعرفوه اللي ممكن توصفوه بالمثل دا؟
2- فيه كلمة تانية مرادفة لكلمة بخت، إيه هي؟
3- إيه المثل اللي ممكن يكون شبه المثل دا في ثقافتكو؟
4- هل بالضرورة الشخص اللي بينطبق عليه المثل دا يكون فاشل أو بخته ضايع؟ وليه؟
– زاد الطين بلَّة
اسمعو وجاوبوا:
1- إزاي تمثلوا المعنى الحرفي للمثل دا؟
2- ممكن نفهم المثل دا بشكل إيجابي وللا معناه مقتصر بس على المعنى السلبي؟ وليه؟
3- هل ممكن تستخدموا المثل دا في كلامكو بالعامية المصرية؟ وفي أي سياق؟
4- في مجموعات صغيرة فكروا في موقف بسيط بينتهي بالمثل دا.
– جه يكحلها عماها
اسمعوا وجاوبوا:
1- فكروا إيه هو الفرق بينه وبين المثل بتاع “زاد الطين بلَّة”؟
2- الضماير اللي في المثل دا بتعود على إيه أو مين؟
3- اتناقشوا سوا في المواقف اللي المثل دا بيعبر عنها ومثلوا مع بعض مشهد نقولوا في آخره “جه يكحلها عماها”.
– الطيور على أشكالها تقع
اسمعوا وجاوبوا:
1- فيه مثل في اللغة بتاعتكوا بنفس المعنى دا؟
2- إمتى ممكن نقول المثل دا؟
3- فيه موقف حصل لكو قبل كدا كان ممكن تستخدموا المثل دا؟
4- في رأيكو، المثل دا ليه معنى وحش وللا كويس؟ وليه؟
– الباب اللي يجيلك منه الريح
اسمعوا وجاوبوا:
1- المثل دا معناه إيه؟
2- المثل بيقصد إيه بالباب وإيه بالريح؟
3- فكروا في موقف المثل دا بيوصفه واحكوه لزمايلكو في الفصل.
4- فيه ناس بتقول إن المثل دا ضد المغامرة أو تشجيع على بقاء الحال على ما هو عليه… إيه رأيكو؟
– أنا وأخويا على إبن عمي
اسمعوا وجاوبوا:
1- إيه معنى المثل دا.
2- تفتكروا موقف حصل معاكوا والمثل دا بيوصفه كويس؟
3- فيه ناس نتقول إن المثل دا بيشجع على التعصب الأعمى… إنتو موافقين على دا؟
4- طيب فيه حديث نبوي شريف ليه معنى قريب من دا لكن تفسيره مختلف شوية… اسألوا مصريين عن الحديث دا وشوفوا همَّ فاهمينه إزاي؟ وبعدين ممكن تشوفوا تفسيره الحقيقي من النت وتقارنوه بكلام المصريين…
نص الحديث الشريف هو: قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ” انْصُرْ أَخَاكَ ظَالِمًا أَوْ مَظْلُومًا ” ، قِيلَ : يَا رَسُولَ اللَّهِ نُصْرَتُهُ مَظْلُومًا ، فَكَيْفَ أَنْصُرُهُ ظَالِمًا ؟ ، قَالَ : ” تَمْنَعُهُ مِنَ الظُّلْمِ ، فَذَلِكَ نُصْرَتُكَ إِيَّاهُ ” .
– من خرج من داره
اسمعوا وجاوبوا:
1- معنى المثل دا صحيح أو لأ.. يعني فعلاً الخروج من الدار مهين؟
2- ممكن تدوروا على مثل معناه ممكن يكون عكس المثل دا؟
3- طيب، فيه في ثقافتكو مثل ليه نفس المعنى دا أو منعى مشابه؟
4- إحكوا موقف ممكن نستخدم فيه المثل دا.
محطة كاسيك مصر- Caasic Egypt Broadcast 