أغنية من بداية القرن العشرين كتبها الرائع بيرم التونسي ولحنها الفنان زكريا أحمد… بتنتقد الواقع المصري بالمقارنة بالحياة في أوروبا وبالأخص في لندن وباريس… كل كوبليه بيقدم صورة سلبية في الشارع المصري ممكن نشوفها في المناطق الشعبية بشكل خاص لكن بشكل كوميدي وبيقارنها بعادات الغرب الأفضل والأرقى…

كلمات الأغنية (على فكرة مش كل الكلمات مستخدمة في الأغنية):

حاتجن يا ريت يا اخوانا ماروحتش لندن ولا باريز
دى بلاد تمدين ونضافة وذوق ولطافة وحاجة تغيظ

ملاقيتش جدع متعافى وحافى وماشي يقشر خص
ولا شحط مشمرخ افندى معاه عود خلفه ونازل مص
ولا لب اسمر وسودانى وحمص وانزل يا تقزقيز
حاتجن يا ريت يا اخوانا ماروحتش لندن ولا باريز

ولا عركة فى نص الليل دايرة بالحيل وساحبها بوليس
قدامها جدع متجرجر وشه معور قال يا عريس
الخلق ماهى بتتجوز واشمعنى احنا مافيش تمييز
حاتجن يا ريت يا اخوانا ماروحتش لندن ولا باريز

ولا واحده فى وش الفجر تبرطع ماليه الدنيا صوات
قال ايه جوز خالتى ام احمد سلفة اخوها السيد مات
سبحانك ما اعظم شانك والله الموت دا مفيد ولذيذ
حاتجن يا ريت يا اخوانا ماروحتش لندن ولا باريز

ولا واحد طالع يجرى وواحد تانى بيجرى وراه
ويقول ها هع حصلتك يابن اللى ابصر ايه عاملاه
لا الشارع غيط يا اخوانا ولا احنا بداره ولا احنا معيز
حاتجن يا ريت يا اخوانا ماروحتش لندن ولا باريز

ولا واحد بيبيع حاجة يقول بريال وتاخدها بصاغ
يا اخوانا دى حتى الابرة تاخدها بوشة وقلب دماغ
حلفان وعراك ومناهده ويمكن ضرب كفوف يا حفيظ
حاتجن يا ريت يا اخوانا ماروحتش لندن ولا باريز

ولافيش ميت الف صعيدى بتوع يانصيب هاجمين ولافيش
ميت الف معوض داعس جاى معاه صندوق ورنيش
والله كرهن القهوة وحرمت اقعد ع الافاريز
حاتجن يا ريت يا اخوانا ماروحتش لندن ولا باريز

ولا شفتش ده اللى بلاسه وده اللى بعمه وده بطربوش
ملابسنا يا ناس تشكيله تعداصحابها ما يتعدوش
دول ناس كنا احسن منهم قول ومسيرنا باذن الله
نبقى احسن منهم برضك بعد الدرس اللى اخدناه
والله ده عيب نتهجى دروس يا اساتذه على التلاميذ
حاتجن يا ريت يا اخوانا ماروحتش لندن ولا باريز