من أشهر أغاني الأطفال اللي ظهرت في الستينات ولحنها وغناها الفنان محمد فوزي… وفيه ناس بتقول إن الأغنية فيها إسقاط سياسي بالأخص على إن ليل الاستعمار انتهى وبدأ فجر الثورة بالذات ثورة يوليو 1952… وفي ثورة 25 يناير 2011 استخدمها الثوار وغيروا بعض الكلمات عشان تناسب الظروف السياسية وقتها… لكن عموماً هي أغنية للأطفال…

ذهب الليل طلع الفجر والعصفور صو صو
شاف القطة قال لها بسبس قالت له نونو

ماما قالت له سيب القطة وخليها في حالها
فات مدرسته ورمى كراسته وراح جر شكلها
راحت القطة مخربشة ايده لما مسك ديلها
وادي جزاة اللي مايسمعش كلمة ماما تقولها

ابله قالت لي فيفي الحلوة زعلت من سوسو
راح يصالحها وباسها وهي حلفت ماتبوسه
جابت الحبر وعاصت ايدها وجت بشويش جنبه
مسحت ايدها في وشه وعملت قال ايه بتلاعبه
سوسو ضربها ومسك الحبر اللي في ايدها وقلبه
على فستانها وشافهم بابا وضربها وضربه

ذهب الليل طلع الفجر والعصفور صو صو
شاف القطة قال لها بسبس قالت له نونو

نذر عليا اجيلكو واولع شمعة من شمعة
لحد الشبر ونص مايكبر ويروح الجامعة
ميمي دكتور وسعاد دكتورة واحنا ندعيلكم
وصلاح يبقى محامي وتوتو قاضي يصالحكم
وعصام بكره حيبقى ضابط ويدافع عنكم
يفدي وادي النيل بحياته وحياته منكم

ذهب الليل طلع الفجر والعصفور صو صو
شاف القطة قال لها بسبس قالت له نونو