محطة كاسيك مصر- Caasic Egypt Broadcast

CAASIC Advanced Arabic Language Materials

– يا مصر هانت

اللي كتب الشعر دا الشاعر الفلسطيني المصري تميم البرغوتي في اليوم التالت للثورة والقاه في لقاء على قناة الجزيرة مباشر أثناء الأحداث المفجعة اللي حصلت مساء يوم الجمعة 28 يناير…


ولما سمعها واحد من شباب الثورة اسمه مصطفى سعيد أُعجَب بالكلمات فغناها على قناة الـBBC

الكلمات:

يا مصر هانت وبانت كلها كام يوم .. نهارنا نادي ونهار الندل مش باين
الدولة ما فضلش منها إلا حبة شوم
لو مش مصدق تعالى ع الميدان عاين
يا ناس مافيش حاكم إلا من خيال محكوم
واللي هايقعد في بيته بعدها خاين
اللي هايقعد كأنه سلم التانيين
للأمن بإديه وقال له هم ساكنين فين
وصلت لضرب الرصاص ع الخلق في الميادين
حتىالجثث حجزوهااكمنهم خايفين
يا مصر أصبحنا أحياء وميتين مساجين
فاللي هايقعد في بيته يبقى مش مفهوم
واللي هاينزل إلهي حارسه صاين

يا مصر هانت وبانت كلها كام يوم … نهارنا نادي ونهار الندل مش باين

نهارنا نادي وبإدينا على فكرة
الصبح عنده فضول راح نعمل إيه بكرا
إيده على الباب خايف يلمس الأكرة
ادخل يا أستاذ براحتك والبلد حرة
إحنا زهقنا نشوف الصبح من بره
ادخل وخرج بقايا العتمة بالمرة
الناس دي حرة وجنود الأمن مضطرة
يا صبح طلعت روحنا لاجل تيجي ياخي
طالعين نجيبها اهه في كل حاره و حي
حتى ولو ضربونا بالرصاص الحي
شوف الميادين كده مفروشه خلق و ضي 
دايماً مفاجأة ودايماً وقتها معلوم
الحكم لينا وليكي الحق يا مداين

يا مصر هانت وبانت كلها كام يوم .. نهارنا نادي ونهار الندل مش باين

يا صف عسكر بدال الدرع شيلوا اتنين
25 يناير يا شباب فاكرين
كان فيه انجليز ووزير الداخلية تخين
كان عنده برضه عساكر زيكم جامدين
سابهم يموتوا علولا لم سأل فيهم
كانوا شبهكم أساميكم أساميهم
يا عسكري البهوات اللي بتحميهم
ممكن يردوا عليك لما تناديهم؟
يا عسكري انا أصلي بس بستغرب
لو لاقي تاكل وتشرب قوم يا عم إضرب
إضرب عشان الوزير من ضربتك يطرب
لكن هتشتغل ايه لما الوزير يهرب

أما الشديد القوي القادر أبو القادر
برميل تلامه ونشع على مصر من الأخر
لو شافته معدده تكتب أدب ساخر
ثابت يقول للهرم يا كابتن إتاخر 
ولم يزل معتقد إن الهرم هايقوم
آدي الحجر والبشر قايمين يا سيد القوم
والدين هايترد ياللي عشت متداين

يا مصر هانت وبانت كلها كام يوم.. نهارنا نادي ونهار الندل مش باين

ده حكم أسرة لا خوفو ولا خفرع
ولا وجع بطن يتعالج بزيت خروع
عمل مسوجر بعيد عنك ولا يطلع
جربنا فيه كل شيء ما لقينا شيء ينفع
مانفعش بالأدوية جربنا ألف طبيب
ولا بعطارة شيوخ ليهم بلح وزبيب
ولا بجحفل مغولي وضرب بالقباقيب
عمل مسوجر وسفلي شغل تل أبيب
وشغل أمريكا متغلف وختمه عليه
ضيف زارنا يا عم من غير دعوة لابس بيه
قاعد 30 سنة ومابيقولش قاعد ليه
والنية يديها لإبنه النابغة بعديه
ويقول قضا وقدر بين البشر محتوم
قلنا له طيب مين عرفك يا فخامتك بالذي كاين
يا مصر هانت وبانت كلها كام يوم … نهارنا نادي ونهار الندل مش باين

Advertisements

No comments yet»

اترك رد

Please log in using one of these methods to post your comment:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: