قام الشاعر جمال بخيت يوم انتصار الثورة بكتابة قصيدة ارفع راسك فوق لكل مصرى بمناسبة الثورة المصرية ارفع راسك فوق انت مصرى…

 

الكلمات:

ارفع راسك فوق                    انت مصرى

بلدك طالعة لفوق                  ياللى كسرت الطوق   

ياللى جبت نصرى

■ ■ ■

ارفع راسك همة                  ياللى نصفت الأمة    

أحبابك وشبابك                   دول قد المهمة

من قوة شهيدهم                   ربك خد بإيدهم     

خمسة وعشرين.. عيدهم     ف يناير.. دا حصرى

ارفع راسك فوق                   انت مصرى

■ ■ ■

ارفع راسك.. طير                ما بقاش فيه أساطير

كل العالم سامع                    صوتك م التحرير

من كل الميادين                   تونس وفلسطين

والباقيين.. جايين                 وشايفهم ببصرى

ارفع راسك فوق                  انت مصرى

■ ■ ■

لما مصر.. بتنطق              يعلا الحق ويسبق

والزيف يدخل جُحره             ولا بيحطش منطق

الراية.. مصرية                 والأمة.. عربية

وادى ورد الحرية               فتح يا ابن عصرى

ارفع راسك فوق                 انت مصرى

■ ■ ■

شعبى بصوته أدلى            عَدَل الدنيا.. عدلة

وف عز الشدايد                غيّرنا المعادلة

لو تزرع هاتجنى             أجمل نول.. ناسجنى

فقر الفكر.. سجنى             والعدالة.. قصرى

ارفع راسك فوق               انت مصرى

■ ■ ■

ارفع راسك.. شب           غنى مكان ماتحب

شعبك خالد.. خالد            لما يهب.. يهب

شعبك.. أجمل شعب         سهل.. ولكن صعب

جاب للحاكم رعب           قال للحاشية.. انكسرى

ارفع راسك فوق              انت مصرى

■ ■ ■

ارفع راسك عيش           نضف.. ما تخليش

علم الحرة الغالية           غيره ما يسترنيش

مش رح نرضى مظالم     ولا هانخاف من ظالم

أصل الشعب العالم          بدّل يسرى.. بعسرى

ارفع راسك فوق             انت مصرى